Ulo sa dalaga napisat sa trak

CEBU, Philippines - Napisat ang ulo sa usa ka babaye human kini matagak sa motor ug naligsan sa usa ka dump truck diha sa Pusok National highway sa barangay Pusok dakbayan sa Lapulapu kagahapon sa udto.

Ang biktima mao si Vanessa Ycong Llanto, 28, kinsa sakay sa motorsiklo sa uyoang si Jovelito Ycong, pulos mga residente sa sitio Mustang, sa barangay Pusok dakbayan sa Lapulapu.

Kagahapon mga alas 10:50 sa sayong kaudtohon samtang luwan si Llanto sa motorsiklo sa iyang uyoan nga si Ycong pipila nalang ka metros sa ilang panimalay kalit kining nasaghiran sa usa ka 10-wheeler dump truck nga gimaneho ni Rebomafel Macadaya Resuelo, 23, residente sa barangay Bagacay dakbayan sa Toledo.

Matud pa ni SPO2 Ruel Nalzaro sa Traffic Division sa dakbayan sa Lapulapu pagkatumba sa motor napasok ang ulo ni Llanto sa ligid sa maong trak ug nalatayan kini sa mga ligid.

Patay na nga miabot sa tambalanan sa Mactan Doctors Hospital ang biktima samtang ang uyuan niini nga si Ycong nahiagom sa mga pangos ug bun-og sa kalawasan sa maong disgrasya.

Matud pa ni Nalzaro bisan pa nga nag-helmet ang mga biktima apan gumikan kay nalatayan sa ligid si Llanto ug napisat ang ulo niini, samtang padayon usab ang obserbasyon sa mga doktor ngadto ni Ycong nga maoy nagmaneho sa motorsiklo.

Sumala pa nga si Resuelo gikan sa barangay Agus naghatod og balas ug pauli na unta kini ngadto sa ilang garahe sa dakbayan sa Mandaue, apan pag-abot sa maong dapit nahibulong nalang kining kalit lamang mipaka ang kilid nga bahin sa iyang sakyanan.

Gikatahong wala siya’y nakitang dunay laing sakyanan sa iyang kiliran ug nadasmagan.

 Ang suspek daling mitahan sa buhatan sa kapolisan ug kasamtangang gibilanggo alang sa tukmang kaso nga ipasaka batok niini.  – BANAT NEWS