Davide rallies gidugok

CEBU, Philippines - Gidugok si Liberal Party gubernatorial candidate Atty. Hilario "Junjun" Davide sa iyang mga supporters sa tulo ka mga dagkong openning rallies sa lalawigan sa Sugbo.

Si Atty. Jodie Castillo, ang tigpamaba ni Davide miingon nga wala nila damha ang kadaghan sa mga mitambong sa tulo ka mga rallies nga miabli sa lokal nga kampanya diri sa lalawigan sa Sugbo sa miaging Sabado ug Domingo.

Didto sa lungsod sa Dumanjug, mipahigayon og lapad nga rally sa Sabado sa hapon ang tanang mga lokal nga kandidato sa segundo distrito sa Liberal Party pinanguluhan ni Dr. Cora Lou Kintanar ang kanhi assistant regional director sa Department of Health nga mikandidato pagka-kongresista.

Si Efren Gica, ang nagpapiling mayor sa Dumanjug miingon nga mikabat og 20 mil ang nanambong gikan sa Dumanjug ug ubang mga munisipyo sa segundo distrito.

Matud ni Gica nga dili gyud matinuod ang gipangangkon sa Kapitolyo nga ilubong nila si Davide ug ang iyang running mate nga si Vice Governor Gregorio Sanchez Jr., sa Dumanjug, apil na ang Alegria ug Dalaguete tungod kay sa One Cebu ang mga mayor.

Mas misamot ang ilang mga singgit sa dihang, giisa ni Davide ang iyang “ticket” nga nakuha sa Cebu South Bus Terminal sa dihang mibayad siya og P5 aron siya makasulod.

Tuyo ni Davide nga wagtangon ang P5 nga terminal fee nga maoy sagad gireklamo sa mga pasahero sa bus nga iyang nasakyan.

Mitunga usab sa maong tigom ang Viva Hot Babe nga si Katya Santos. (BANATNEWS)