Palcuto: Komunismo, krimen angay sulbaron sa gobyerno

CEBU, Philippines - Kandidato pagka-bise mayor sa dakbayan sa Sugbo nga kanhi opisyal sa Armadong Kusog sa nasud mipadayag sa iyang kasagmuyo sa kaluag sa nangaging administrasyon paggukod sa mga komunistang rebelde, terorista ug mga kriminal.

Si kanhi Col. Ariel Palcuto nagkanayon nga sa pamunoan ni anhing Pres. Cory Aquino nagsugod ang kaluag paggukod sa mga rebelde ug mga kriminal pinaagi sa pagbukas og negosasyon.

Matud ni Palcuto nga mao kini ang hinungdan nga hangtod karon dili masulbad ang rebelyon ug kriminalidad.

“Please take note that our country will never go somewhere and our economy will never progress unless the problem in Mindanao, specially that of terrorists and Muslim separatist groups, shall be addressed,” si Palcuto mipasabot.

Sumala pa ni Palcuto nga makaluluoy ang mga sundalo ug kapolisan nga nagtuman sa ilang trabaho, apan dili makasugakod paggukod sa mga rebelde ug kriminal tungod sa kaluag sa gobyerno.

Mao kini, matud ni Palcuto, ang hinungdan nga magpapili siya pagka-bise mayor sa dakbayan sa Sugbo, tungod sa iyang nakita nga dinhi sa Sugbo luag usab kaayo ang paggukod sa mga kriminal hinungdan nga aduna gihapoy mga insidente nga makadaot sa ekonomiya ug makahadlok sa mga mamuhonang negosyante.

Si Palcuto naila nga “Mr. Nobody” atol sa iyang pagka-opisyal sa Philippine Constabulary tungod kay wala siyay giila sa iyang paggukod sa mga kriminal. Si Palcuto maoy naila nga opisyal sa Armadong Kusog nga nakalimpyo sa terorismo ug kriminalidad sa nagkadaiyang lugar sa Luzon, Visayas ug Mindanao.  – BANAT NEWS