GMA mobalik sa Cebu, mosubo sa planta sa kuryente

CEBU, Philippines - Gikatakdang mobalik si Presidente Gloria Macapagal Arroyo dinhi sa Sugbu karung semanaha aron motambong isip pinasidunggang dinapit sa inagurasyon ug opisyal nga pagbukas sa usa sa tulo ka mga planta nga mo-operate ug gipaabot nga makatabang sa problema sa kakuwang sa supply sa kuryente dinhi sa Sugbu. Si Arroyo moabot karung Biyernes sa buntag ug modiretso sa dakbayan sa Toledo aron motambong sa opening sa planta nga iya sa Cebu Development Corporation (CEDC) diin dunay laing tulo ka plantang dunay kinatibuk-ang 64 megawatts.

Apan ang una niining planta inisyal nga gibuksan niadto pang Pebrero 14 apan opisyal na gyud kining mo-operate karung adlaw'ng Biyernes ug gipaabot nga 82 megawatts ang mahatag nga dugang supply sa kuryente alang sa Cebu grid.

Matud sa Visayan Electric Company (VECO) nga 72 megawatts ang direktang mahatag nga supply sa kuryente dinhi sa Sugbu niining mga bag-ong planta sa CEDC.

Ang CEDC ug VECO dunay memorandum of agreement (MOA) sa milabay'ng buwan aron mopalit ang VECO og 105 megawatts nga gikan sa CEDC.

Sa nasayran niadtong miaging semana si Arroyo mianhi usab sa Sugbu ug mibisita sa Malapascua Island ug Tagbilaran City sa Bohol tungod sa programa niini kabahin sa turismo dinhi sa rehiyon siyete. (Rey Pasaporte)   (BANATNEWS)