Naghiusang grupo sa Barili nag-una

CEBU, Philippines - Ang One Cebu/Lakas Kampi sa Barili nga gipangulohan ni incumbent Mayor Undo Marinas ug Marlon Garcia, sa pagka -bise mayor maoy nag- una karon sa ilang lungsod sa Barili, matud ni Rene Alquizola, retiradong station manager sa estasyon DYMR, Radyo ng Bayan Cebu kinsa kandidato usab sa pagka- konsehal sa maong partido.

Gibutyag ni Alquizola sa Banat News nga ang ilang pundok karon maoy may klarong plataporma, kay sa wala pa magkahiusa ang duha ka grupo aduna na sila’y daang programa de gobiyerno.

Karon nga nagkahiusa na ang pundok ni Mayor Marinas ug ang kang Marlon Garcia,   igsoon ni Gobernador Gwen Garcia, misamot na kalig-on ang ilang partido kay natapakan ang haw-ang niini kaniadto sa wala pa sila maghiusa. 

Nakaingon si Alquizola nga kun magpadayon ang maong dagan hayag kaayo ang katumanan sa duha ka dagko niyang plano alang sa ilang lungsod tungod kay wala na man unya’y sagabal sa pagpangita og pundo nga magamit sa pagpatuman niini.

Usa sa mga gidamgo ni Alquizola mao nga ang kasamtangang merkado sa barangay Mantalongon himoong usa ka Regional Livestock and Vegetable Market aron nga dili lamang sa matag Huwebes himoon sa maong lugar ang tabo kundili sa tanang adlaw na, matud pa niya. 

Hinuon, miingon sa Alquizola nga nagkinahanglan gyud kini og dakong gahin nga salapi kay magpatukod naman unya og pipila ka mga edipisyo sa maong lugar alang sa hapsay ug lapad nga espasyo sa merkado.

Sa pagkakaron, dako pa kaayo ang wala pa magamit o bakante nga lugar sa merkado sa Mantalongon.

May plano usab si Alquizola nga himoong commercial nga pantalan ang dunggoanan sa barangay Japitan diin gawas sa mga lokal nga mga mananagat nga mogamit niini, mahimong bukas usab kini sa mga produkto gikan sa atbang mga lungsod ug siyudad sa Negros Oriental.

Ang mga produkto nga gikan usab sa Barili , sama sa mga utanon sa Mantalongon , Dalaguete makaabot na usab ngadto sa Negros pinaagi sa maong pantalan.

Ang mga komprador ug mga hayop dili na unya maghuwat pa sa adlaw’ng Huwebes, kay pinaagi sa maong pantalan makapangompra na sila bisan unsang adlawa sa mga kahayopan sa Negros.

Matud pa ni Alquizola nga kining duha ka dagkong proyekto dako kaayo unya og ikatabang sa pagpatubo sa kinitaan sa Barili.

Midugang siya nga ang bulig sa katawhan sa Barili alang sa One Cebu maoy sulbad sa gipangitang kauswagan sa tanang Barilinhon sa ilang lungsod. - Wen Celen (BANAT NEWS)