14-anyos gitusak og dunggab sa laing bata

CEBU, Philippines - Gipangita sa kapolisan ang usa ka 13-anyos nga bayong -bayong kinsa gisuspetsahang maoy midunggab sa 14-anyos nga dalagita sa sulod sa merkado sa barangay Yati, lungsod sa Liloan sa miaging kaadlawon.

Ang biktima 14-anyos samtang ang suspetsado usa ka 13-anyos kinsa giingong ilado sa kapolisan sa maong lugar nga banggiitang kawatan ug silingan ra sa biktima.

Si SPO1 Ricardo Rodriguez sa kapolisan sa Liloan mibutyag sa Banat News nga nailhan nila ang suspetsado apan gipugngan nila ang ngalan niini tungod kay menor de edad pa.

Ang saksi nga maoy unang mitumbok sa ngalan sa suspetsado ug mitaho sa kapolisan mao si Rodrigo Sasing Daday, usa ka drayber sa habal-habal sa maong lugar.

Matud pa ni SPO1 Rodriguez nga natulog ang biktima sulod sa merkado nga nagbantay sa iyang mga baligyang utanon aron maninda inig ka buntag, dihang gisulod kini sa suspetsado ug gipanunggab sa dala niyang kutsilyo.

Samdan ang biktima sa liog, tuong bukton, aping ug ubol-ubol apan nakasinggit kini ug nakapangayo og panabang, ug si Daday nga nag-atang og pasahero maoy nakakita sa suspetsadong migawas gikan sa merkado nga nagdagan pahilayo sa maong lugar.

Gihatod dayon ang bikitima ngadto sa Vicente Sotto Memorial Medical Center sa dakbayan sa Sugbo.

Gituohan sa kapolisan nga mangawat unta ang suspetsado apan dihang nakamata ang bikitima, giluba niya kini.

Hinuon si SPO1 Rodriguez nagkanayon nga andam itahan sa amahan ang iyang anak nga suspetsado ngadto sa mga awtoridad sa kapolisan. - Darrel A. Carumba (BANAT NEWS)