Proyekto sa kabarangayan ipadali

CEBU, Philippines - Gitinguha ni Cebu City Mayor Tomas Osmeña nga madali ang pagpatuman sa nagkadaiyang proyekto sa kabarangayan sa dakbayan alang sa kaayohan sa mga molupyo.

Tungod niini, gimandoan sa mayor si ABC president Eugenio Faelnar nga maoy mo-follow-up ug mo-monitor sa ipatuman nga mga proyekto.

Ang maong mando gihimo sa mayor sa wala pa siya molarga ngadto sa Estados Unidos niadtong miaging semana.

Ang iyang panaw may labot sa iyang quarterly medical check-up nga may labot sa iyang post cancer regimen.

Pipila sa mga proyekto nga ipatuman sa mga barangay mao ang road concreting, drainage system, ug uban pang mga infrastructure project nga gigahinan nang daan og pundo.Lakip niini ang mga programa sa kabarangayan nga nanginahanglan og minilyon ka pesos nga pundo alang sa epektibong pagpatuman niini.

Matud ni Faelnar nga gusto sa mayor nga kasugdan na ang pag-implimentar sa nagkalainlaing proyekto samtang tua pa siya sa Estados Unidos.

Mao nay iyang gitugon nga kung mahimo kasugdan na kining mga proyektoha aron inig balik niya dinhi sa Sugbu iya nang masud-ong”,sumala ni Faelnar.

Niadtong Oktobre sa miaging tuig, ubay-ubay nga mga barangay ang mipirma og kasabutan tali sa kagamhanan sa dakbayan alang sa yano nga pagpagawas sa pundong salapi nga gamiton sa giproponer nga mga proyekto sa kabarangayan. - BANAT NEWS