Vendors sa dalan hingpit na i-ban

CEBU, Philippines - Hingpit nang i-ban o idili ang mga street vendors sa kadalanan sa dakbayan sa Sugbu human natukod ang Task Force Cleanup sa siyudad sumala pa ni Konsehal Sylvan “Jack” Jakosalem, ang gisangunan nga mamahimong tigpamaba sa nahisgutang task force. Matud sa konsehal nga gitugutan sa kagamhanan sa dakbayan ang mga manindahay nga makapaninda diha sa mga sidewalk.

Apan gipadayag ni Jakosalem nga ang city government dili makatugot nga lakip na ang karsada gamiton sa mga vendors alang sa ilang pagpamaligya.

“I-ban na gyud nang mga street vendors kay anha man moagi ang mga sakyanan unya daghan na kaayong nangreklamo kay grabe na ang traffic,” sumala ni Jakosalem.

Lakip sa mga dalan nga giila ni Jakosalem nga gihugpaan sa mga street vendors mao ang B. Rodriguez, Natalio Bacalso Avenue (duol sa Emall), silinganang dapit sa simbahan sa Redemptorist, Osmeña Boulevard, Colon ug uban pa.

Matud ni Jakosalem nga ang ilang gipasikaran sa katukuran sa Task Force Cleanup mao ang kamanduan ni Mayor Tomas Osmeña paghawan sa kadalanan.

Ang Squatters Prevention Encroachment and Elimination Division (SPEED) maoy nangulo sa task force pagpatuman sa clearing operation. Matud sa hepe sa SPEED nga si Vicente Mercado nga ubay-ubay na nga mga pushcart ug mga hapag ang ilang nasakmit gikan sa mga vendors tungod usab sa giingong pagmagahi sa mga street vendors sa ilang gihimo nga mga pasidaan sa dili pagpaninda sa kadalanan.

Gipadayag hinuon ni Mercado nga malukat pa sa badlungong mga vendors ang gisakmit nilang mga pushcart uban sa mga baligya niini apan gitataw sa labaw sa SPEED nga gikinahanglang mobayad una sila og multa nga P500 ang mga street vendors sibo sa nalatid sa City Ordinance 801. – BANAT NEWS