Alvin: Noynoy daog kun ang eleksyon karon

CEBU, Philippines - Nangangkon ang kandidato pagkamayor sa Kugi Uswag Sugbu (Kusug), kanhi mayor Alvin Garcia, nga daog na dinhi sa Sugbu si Senador Benigno ‘Noynoy’ Aquino pagka-presidente kun ang eleksyon sa Mayo karong panahuna dayon buhaton.

Kini maoy reaksyon ni Garcia taliwa sa pagpasigarbo sa iyang ig-agaw nga si Gobernadora Gwendolyn Garcia kang kanhi Defense Secretary Gilberto ‘Gibo’ Teodoro nga maoy nidaog sa usa ka mock election atol sa presidential forum sa miaging semana nga gitambungan sa unom ka presidential candidates.

Ang kanhi mayor walay pupanaganang mipadayag nga kung mag-eleksyon karong adlawa, sigurado nang modaug si senador Aquino.

“I think at this stage ahead man gyud si Noynoy kay ato man gyud nga makita nga si Noynoy is winnable pero layo pa nuon ang eleksyon,” sumala ni Garcia.

Gani gipadayag sa kanhi mayor nga ang Kusug andam untang mosuporta sa kandidatura ni Aquino alang sa pagka-presidente.

Kini kun wala pa paluyuhi sa ilang kaatbang nga grupo sa pulitika nga mao ang Bando Osmeña Pundok Kauswagan (BOPK) si Aquino.

“Tua na man gud sa ila, so, we will now have to choose kung kinsay next winnable sa mga presidential aspirant nato,” dugang pamahayag ni Garcia.

Nasayran nga duha na lang ka kandidato pagka-presidente ang gipilian karon sa Kusug nga ilang suportahan sa umaabot nga eleksyon, kini mao sila si Teodoro nga maoy kandidato sa administrasyon ug si Senador Manny Villar nga nagsunod kang Aquino sa mga survey.

Miingon hinuon si Garcia nga dako ang kahigayunang si Villar maoy ilang suportahan tungod kay kini giingong maoy posibleng mopildi kang Aquino. – BANAT NEWS