Duha naangol pagpamusil sa managlahing dapit

CEBU, Philippines - Nalandig sa tambalanan ang usa ka 36-anyos nga lalaki human kini mapusili samtang nagkalingaw og videoke sa usa ka imnanan diha sa sitio Ylaya, barangay Talavera siyudad sa Toledo kagahapon sa alas 12:30 sa kaadlawon.

Ang biktima nga nalandig sa tambalanan mao si Rene Velloria, 36, molupyo sa maong lugar samtang ang namusil wala pa mailhi sa kapulisan sa paghimo ning balita.

Matud ni PO1 Florante Cayson sa Toledo City Police dihang nahinabi sa Banat News, kauban sa biktima ang mga barkada nag-inom sa maong videokihan dihang kalit miabot ang wala mailhing lalaki ug namusil makaduha ka higayun.

Si Velloria naigo sa sentro nga bahin sa lawas ug daling gidala sa iyang mga kaubanan sa Toledo City District Hospital, samtang ang suspek dali usab nga nakasibat, wala pa matino ang motibo sa krimen.

Samtang sa laing bahin, napaksit ang ulo sa usa ka lola human kini aksidenteng naigo sa saag nga bala dihang nagpataka og pasalba sa iyang armas ang usa ka lalaking hubog sa barangay Tabok Kamalig Bato siyudad sa Danao niadtong Biyernes sa alas 10:30 sa gabii.

Ang biktima nga nalandig sa tambalanan mao si Victoria Pretos, 76, molupyo sa maong lugar, samtang ang suspek mao si Efren Regala, 40, nga giingong pwerteng huboga niadtong higayuna.

Matud pa ni PO3 Bryan Batiquin sa Danao City Police dihang nahinabi sa Banat News, nagpataka og pabuto og armas ang suspek ug namusil sa mga basiyo sa softdrinks diha sa maong dapit.

Giingong naatol usab nga milabay ang biktima sa nahisgutang dapit ug natapsingan sa ulo gikan sa saag nga bala hinungdan nga gidala kini sa Danao District Hospital.

Ang mga polis nga miresponde midakop sa suspek ug gikatakdang pasakaan og kaso karong adlawa, nakuha gikan kaniya ang usa ka kalibre .22 magnum nga dunay usa ka kabhang sa bala sa cylinder niini.

Gibutyag sa suspek dihang nahinabi sa Banat News sa telepono nga nalimot na siya sa tanan niyang gibuhat niadtong tungura tungod sa iyang hilabihang kahubog. (Darrel Carumba)    (BANATNEWS)