2 naghikog sa managlahing dapit

CEBU, Philippines - Duha ang naghikog tungod sa gikatahong giatubang nga mga problema sa pamilya sa managlahing lugar ug oras sa dakbayan.

Pasado alas 7 kagahapon sa buntag napalgang patay diha sa sitio Mangga barangay Mambaling si Jhunio Alimorin Mabatid, 29, usa ka garbage collector sa barangay Sto. Niño nga nakit-an ni Generam Esmeñe nga nagbitay sulod sa barong-barong niining gipuy-an.

Nasayran nga si Esmeñe nakadungog og kasikas sa dihang nangihi siya sa gawas sa ilang panimalay nga duol ra usab sa panimalay ni Mabatid pasado alas tres sa kaadlawon kagahapon.

Tungod sa iyang pagkakuryoso iyang gilili ang panimalay ni Mabatid ug nakit-ang nagbitay na si Mabatid ug may hikot nga nylon sa liog ngadto na sa kahoy sa ilang kisame. Matud pa ni PO2 Julius Mabunay sa Homicide Section nga nagkaaway si Mabatid ug ang iyang asawa sa wala pa kini maghikog.

Samtang sa laing bahin, usa usab ka babaye ang nagkutlo sa iyang kaugalingon pasado alas dos sa miaging hapon sa barangay Lorega ug giilang si Sarah Marie Gualiza,19. Ang kapuyo niining si Ramwil Linganay, 22, maoy nakakita kaniya ug mibutyag nga nanglaba siya niadtong tungura dihang nabantayan niyang napawong ilang suga.

Nahibulong nalang siyang may gihikot nga habol sa ilang bintana ug dihang iyang giablihan ang pultahan naka-lock kini hinungdan nga iyang gipugos og abli ug nakugang nalang siyang nagbitay na kini.

Ang namatay gidali pagdala sa Cebu City Medical Center apan gibalhin nausab kini sa Cebu Doctors Hospital apan namatay kini sa miaging hapon. - Lesley Caminade  (BANAT NEWS)