Ginang gitulis sa nagmotor mitibi

CEBU, Philippines -  Gihimulbolan sa iyang salapi ug alahas ang usa ka ginang human kini tulisa sa duha ka tawong nagsakay og motorsiklo didto sa 1st St. barangay Oldog ,dakbayan sa Talisay kagahapon pasado alas 5:00 sa buntag.

Giila sa kapolisan sa Talisay ang biktima nga si Diecebel Tabar, 31, minyo , nga taga barangay Oldog sa nahisgutang dakbayan .

Base sa ilang imbestigasyon nasayran nga ang biktima nagpaabot sa iyang kauban sa trabaho sa nahisgutang lugar dihang kalit lang mihunong sa iyang atubangan ang usa ka motorsiklo nga gisakyan sa duha ka tawong wala hiilhi.

 Apan ang nag-angkas nga maoy miduol kaniya , milanit sa armas de fuego ug gition ngadto sa biktima dayong pahibawo nga tulis.

Usa sa mga silingan sa biktima ang nakabantay sa maong hitabo, misuway sa pagtabang niini, apan gipabuthan siya sa tulisan ug maayo nalang kay wala siya maigo.

Sa kabalaka nga kahunosan siya sa kinabuhi, gitunol nga malinawon sa biktima ang iyang bag nga may sulod nga ATM card, relo de pulso , cell phone nga balor og P7 mil ,ug salapi nga P150.

Nagtibi ang biktima nga misumbong sa kapolisan sa maong dakbayan ug sa pagkakaron milihok na ang mga otoridad sa pagpangita sa maong mga tulisan. - Raymond D. Abarcas  (BANAT NEWS)