Mga batang babaye 'gidagit'

CEBU, Philippines - Usa ka 13-anyos nga tinun-an ang nakaipsot gikan sa tulo ka mga lalaking giingong midagit ug mipasakay kaniya sa usa ka van niadtong Lunes sa hapon sa barangay Poblacion lungsod sa Carcar.

Ang minor de edad 1st year high school sa Carcar Academy, taga sitio Tangasan sa barangay Valladolid sa maong lungsod ang nakalingkawas dihang miambak sa kolor pulang L-300 van atol sa ilang paghunong sa Ward 1 Poblacion, Minglanilla.

Si SPO3 Jonas Pananganan sa Carcar Police Station nga gikahinabi sa Banat News nagkanayon nga ang minor de edad mibutyag nga tulo sa mga midagit kaniya usa ka tiguwang mga 60-anyos ug maoy driver sa van ingon man duha ka kaubanang nagpangidaron sa 25 ngadto sa 30-anyos.

Si SPO3 Pananganan nagkanayon nga ang 13-anyos mibutyag nga samtang kini nagpaabot sa tindahan nga mangabli aron mopalit og school project, usa ka tiguwang lalaki ang miduol kaniya ug mihangyong ipatunol ang pitaka niining nahagbong hinungdan nga iya kining gipunit ug gitunol sa maong tawo. Apan kalit lang siya gikuptan niini ug gitiunan og kutsilyo dayong bahad og “ayaw pagsiyagit patay karon” dungan sa pagpagsulod kaniya sa van.

Ang biktima mitug-an nga dunay tawong nakakita sa gibuhat sa tiguwang ug misitar sa pag-ingon “unsa mana noy!” apan gitubag kini sa tiguwang og “ako ning supakirang apo!”

Matud pa sa biktima duna say laing mga batang babaye diha sa sulod sa van nga pulos naghilak nga susama niya og pangidaron ug ang uban mas bata pa.

Sa iyang kahadlok nga dili na sila magkita sa iyang mga ginikanan ug mga igsuon mihilak nalang usab siya’g apil ug wala na makapangutana sa mga ubang mga bata kabahin sa sitwasyon. Matud pa ni Pananganan wala gaposa ang mga bata ug wala sad magtaptap ang mga gikatahapan.

Ang bata mibutyag usab nga mihunong sila sa barangay Lagtang sa Naga kay nangihi ang tulo ka mga gikatahapan, pag-abot sa Ward 1 Poblacion Minglanilla, usa sa mga gikatahapan ang mihangyong mamalit og pan.

Sumala pa niini nga dihang nakaagi sila og bakery mihunong ang van ug ang kwarta niyang igpapalit og project maoy gikuha ug gigamit pagpalit og pan.

Matud pa niini nataligam-an sa suspek pag-lock ang pultahan hinungdan nga nakagawas siya ug midagan, misuway og gukod ang lalaking naglingkod sa front seat apan nakalabang na siya sa dalan maong mibalik nalang kini sa van ug milahos og padagan.

Usa ka dispatcher nga si Alex Gallarde mibadlong pa sa van nga nag-parking sanglit nakabara kini sa trapiko.

Matud pa ni Pananganan hapon nang mitug-an sa kapulisan sa Carcar ang bata ug ginikanan tungod kay nagbaklay nga mipauli ang bata gikan sa Minglanilla.

Sumala pa ni SPO3 Pananganan nga iyang nakahinabi si Gallarde sa Minglanilla ug kini mikumpirmar nga duna gyu'y van nga kolor pulang nakabara sa trapiko nga iyang gisitar apan wala niini makuha ang plaka gawas lang nga may pintal kining green.

Ang pangulo sa kapulisan sa lalawigan sa Sugbu, Sr. Supt. Jesus Gaquing nga gikahinabi sa Banat News nagkanayon nga hangtud karon dili pa makunsiderar nga kidnapping ang maong hitabo kay wala pay nangayo og ransom.

Gimandoan na niya ang Provincial Intelligence Branch (PIB) pag-abag sa Carcar Police sa pag-imbestigar sa maong hitabo ingon man ang pag-monitor sa kalungsoran sa maong sakyanan. (BANATNEWS)