Wa mohatag og kuwarta giluba

CEBU, Philippines - Nabulit sa mga samad dinunggaban ang kalawasan sa usa ka construction worker human mobalibad paghatag og kwarta sa minor de edad nga rugby boy sa miaging gabii sa sitio Torel, barangay Canjulao, dakbayan sa Lapulapu.

Ang biktima mao si Rico Baguio, 27, samtang ang midunggab kaniya mao ang 17-anyos (ngan gipugngan tungod sa edad) nga rugby boy nga silingan.

Si SPO1 Frederick Islet sa Homicide Section nga nahinabi sa Banat News miingon nga nasugatan sa suspetsado ang biktima paingon sa ilang panimalay ug giingong gihingian kini sa batan-on aron ipalit og bino.

Ang biktima mibalibad ug midiretso og lakaw pauli apan nasuko ang suspek ug kalit nga gitampok og kutsilyo sa bukobuko ug ubang parte sa lawas ang biktima.

Ang biktima gidala sa Lapulapu District Hospital samtang daling nakaikyas ang suspek.   (Romeo Limpangog)   (BANATNEWS)