14-anyos gi-rape sa Amerkano

CEBU, Philippines - Tulo ka mga kaso ang gipasaka sa kapulisan sa dakbayan sa Sugbu batok   kang Perry McNelly ,66, nga nadakpang nagdala’g minor de edad niadtong Martes sa hapon sulod sa usa ka motel diha sa barangay Lahug ning dakbayan sa Sugbu.

Si Chief Insp. George Ylanan, hepe sa Investigation Section sa Investigation and Detective Management Branch (IDMB) sa Cebu City Police Office nagkanayon nga inabagan sa International Justice Mission napasaka nila ang kasong kalapasan sa R.A.7610 Anti-Child Abuse Law, ug R.A.9208 Anti-Trafficking in Person Act, ingon man rape. Samtang ang kauban ni McNelly nga sila si Michael Lopez, 42 ug Andrey Breeding gipasakaan sad og kasong kalapasan sa R.A.7610.

Si Ylanan mibutyag nga ilang gidugang ang kasong rape batok McNelly human ang 14-anyos mibutyag nga gipugos siya niini pagpakighilawas niadtong Disyembre 1 ning buwana.

Base sa nakuhang impormasyon sa IDMB gikan sa BID-7 si McNelly gitangtang na sa listahan sa mga undesirable aliens hinungdan nga nakabalik kini dinhi sa Pilipinas niadtong Nobiyembre 25.

Samtang si Lopez nga usa ka Amerkano nabilanggo na kaniadto dinhi tungod sa kasong homicide apan nakaeskapo ug didto miagi sa Zamboanga City apan nadakpan ug gibalhog sa BID-Mactan diin sila magkaila ni McNelly.

Si Ylanan nagkanayon nga duna sila’y daghang mga ebidensya batok kang McNelly gikan sa mga camera sa cellphone niini diin didto ang kapin sa 800 ka mga babaye sagad minor de edad nga nakighilawas ingon man naghubo.

Si Lopez nga ni-atubang sa mga sakop sa media nagkanayon nga mopasaka usab sila og kaso batok nilang Ylanan kay gi-setup sila kay igo ra siyang mobisita kang McNelly apan gibunlot sa mga polis ug gipasulod sa kwarto sa hotel.

Gibutyag niini nga wala siya mo-anhi sa Pilipinas aron manakit og mga Filipino sanglit ang iyang asawa taga Minglanilla ug duna sila’y tulo ka anak.

Si Ylanan sa iyang bahin nagkanayon nga depensa usab kini nilang Lopez apan duna sila’y mga ebidensya sa cellphone nga ila karong gipa-transcribe ang mga text message nga tataw’ng nagsabot sila nga binastos ang mensahe ug paadtuon sila sa maong hotel. - BANAT NEWS