Carwatch giluba sa sapatero patay

CEBU, Philippines - Namatay ang usa ka magbalantay og sakyanan human kini gitusak-tusak og dunggab sa usa ka sapatero sa miaging hapon sa dalan Pelaez barangay San Antonio ning dakbayan. Ang namatay nailhan lang sa pangalang “Opaw” nga tigbantay og sakyanan samtang gipangita pa sa kapolisan ang mamumuno nga nailhan lang usab sa pangalang Otik. Sumala pa sa imbestigasyon nga nag-ayo og sapatos ang mamumuno nianang tungura dihang miabot ang biktima nga hubog ug nangayo og kwarta.

Ang gikatahapan gikatahong nasuko ug mibalibad apan namugos ang biktima hinungdan nga giduslak kini makadaghang higayon sa taas nga dagom pangtahi sa sapatos diha sa tiyan.

Ang biktima gidala sa Cebu City Medical Center (CCMC) apan namatay kini pipila ka oras ang milabay.

Si PO2 Lou Pagara mibutyag sa Banat News nga base sa nakuha nilang kasayuran nabilanggo na kaniadto ang biktima ug duha ka higayon na kining gikabangi sa suspek tungod sa paglungkab niini sa gamit pag-ayo og sapatos sa suspek. (Lesley Caminade)   (BANATNEWS)