Polis pakyas pagsikop ni Joavan

CEBU, Philippines - Napakyas ang kapolisan sa dakbayan sa Lapulapu nga pinangulohan ni Supt. Clifford Gairanod pagsikop sa sinagop ni Mayor Socrates Fernandez nga si Joavan kagahapon sa hapon.

Kini may kalabutan sa kasong paghupot og illegal drugs ug armas niadtong bulan sa Septiyembre diha sa atubangang bahin sa Mactan Cebu International Airport human sa ginukdanay sa mga sakop sa Highway Patrol Group.

 Si Joavan una nang nakapiyansa sa kasong paghupot og drugas apan niining buwan sa Oktubre nalutsan og warrant of arrest sa kasong illegal possession of low powered firearms and ammunitions nga kabahin sa duha ka kasong gipasaka sa HPG batok kaniya.

Ang nahisgutang warrant of arrest giluwatan ni Judge Allan Garciano sa Municipal Trial Court in Cities sa dakbayan sa Lapulapu ug kagahapon sa hapon gi-served sa grupo ni Gairanod.

Si PO2 Jundave David sa Talisay City Police Station kinsa usa sa mikuyog sa pag-serve sa warrant of arrest mibutyag sa Banat News kagahapon nga ang misugat kanila si Cathy, asawa ni Joavan tungod kay ang suspetsado wala diha sa ilang balay sa Friendly Homes, Barangay Bulacao, Talisay.

Si Supt. Henry Biñas, hepe sa TCPS mibutyag sa Banat News nga wala silay nadawat nga kopya sa nahisgutang warrant batok kang Joavan ug kagahapon sa udto mianha sa ilang buhatan ang grupo ni Gairanod ug nakig-ayuda sa pag-serve sa warrant batok sa sinagop sa mayor sa siyudad. – BANAT NEWS