Moske, kabalayan naugdaw

CEBU, Philippines - Usa ka moske ug gibana-banang napulo ka panimalay ang naugdaw sa sitio Iba sa barangay Basak sa dakbayan sa Lapulapu kagahapon sa hapon. Ang maong sunog nga giisa sa 3rd alarm nakontrolar dayon sulod lang sa tulo ka minutos. Sa report sa DyAB kagahapon gisusi na karon sa kabomberohan ang report nga nagsugod ang sunog sa panimalay sa usa ka Ibrahim Mustafa kansang mga anak nangatulog ug nagkandila nianang tungura. Dugang gisubay mao ang report nga nagsugod ang sunog diha sa panimalay sa usa ka Hadji Fahad apan wala pay kumpirmasyon ang kabumberohan sa duha ka mga report. Hinuon gibutyag ni Chief Insp. Ricardo Cornelio sa Lapulapu City Bureau of Fire Protection nga wala makahuygo ang kalayo gumikan kay wala mokusog ang hangin. Sagad sa mga panimalay ginama sa mga light materials apan tungod kay duol ra ang fire substation daling natabang ang kalayo ug napawong dayon. Atol ning pagsulat sa balita wala pa matino ang hinungdan sa sunog. (Bong Soriano)   (BANATNEWS)