Manager sa sikyo dasmagan kritikal

CEBU, Philippines - Kritikal ang kahimtang sa manager sa usa ka security agency human kini madasmagi og mini bus sa iyang paglabang sa karsada didto sa Sitio Sambag barangay Tuyan lungsod sa Naga niadtong Biyernes sa alas 6:30 sa gabii.

Ang biktima mao si Wilson Pondador Cruz, 54, minyo, nga taga Unit-3 Opra, Kalunasan, dakbayan sa Sugbo , ug operations manager sa Bisda Security Agency.

Samtang ang nakadasmag niya mao ang usa ka Mitsubishi mini bus nga dunay rota nga Barili -Cebu City nga gimaneho ni Deloraso Concordio, hingkod, nga taga Patupat, lungsod sa Barili.

Si PO2 Ken Cabrera sa Naga mibutyag sa Banat News nga ang mini bus gikan sa siyudad sa Sugbo paingon sa Barili dihang pag-abot niini sa maong lugar mikalit lang og tabok sa karsada ang biktima.

Gumikan sa kakalit wala na mapiog sa drayber ang dagan sa sakyanan busa nadumbolan gyud ang biktima ug napantok ang ulo niini sa   sementadong karsada ug nakaangkon kini og mga bun-og ug dagkung pangos sa kalawasan.

Daling gidala sa South General Hospital sa maong lungsod ang biktima samtang ang drayber sa mini bus boluntaryo dayung nitahan sa iyang kaugalingon sa kapolisan ug nagtingkagol na karon sa detention cell. (Darrel A. Carumba)   (BANATNEWS)