3 ka bata gimolestiya

CEBU, Philippines - Gidakop ug gibalhog sa detention cell ang usa ka construction worker human gipasanginlang mimolestiya sa tulo ka mga batang babayeng iyang silingan nga pulos pa nagpangidaron og 5, 6 ug 7-anyos sa barangay Nangka lungsod sa Consolacion niadtong Domingo sa alas 4 sa hapon.

Ang magsuon nga biktima nga 6 ug 7-anyos ingon man ang silingan nilang 5-anyos nga biktima mitumbok sa suspek nga ilaha ra usab nga silingan nga si Jimmy Alburo, minyo ug lumad nga taga lungsod sa Bogo ug kasamtangang nagpuyo sa maong lugar.

Matud pa ni PO2 Marjorie Paller sa Women’s Desk sa Consolacion Police dihang nahinabi sa Banat News ang mga biktima mitug-an nga gihatagan sila   og mani sa suspek ug pagkahuman gidala sila sa pinuy-anan niini.

Apan pag-abot sa pinuy-anan niini gidala sulod sa kasilyas ug diha gitagsa-tagsa pagpasulod ug gipangmolestiya ug pagkahuman sa yawan-ong buhat sa suspek gipapauli sila niini.

Ang 5-anyos nga biktima maoy misumbong sa iyang ginikanan sa gibuhat sa suspek ngadto kanila hinungdan nga gi-report dayun sa mga ginikanan ang maong panghitabo sa barangay hall.

Daling miresponde ang mga tanod uban ni Kagawad Reynaldo Gasal ug naabtan nila ang suspek ug gisukit-sukit, gikatahong miangkon ang suspek sa iyang gibuhat hinungdan nga gidala siya ngadto sa kapolisan alang sa pagpasaka na og kaso.

Atol sa gihimong imbestigasyon sa kapulisan positibong gitumbok sa mga biktima ang suspek nga maoy mimolestiya kanila.

Nasuta sab sa pakisusi nga atol sa maong panghitabu nanimaho sa ilimnong makahubog ang suspek nga gituohang ubos sa impluwensiya sa bino niadtong tungura pagbuhat og malaw-ay sa mga bata.   (BANATNEWS)