Gilugos sa kabarkada sa uyab

CEBU, Philippines - Usa ka drayber sa taxi ang nagtingkagol sa Talisay City detention cell human ireklamong miunay og lugos sa 18-anyos nga dalagang uyab sa iyang higala niadtong Sabado sa hapon diha sa barangay Lawaan III, dakbayan sa Talisay.

Ang suspetsado giila sa mga polis nga si Michael Cañete, 33, minyo, taga sitio Crusher sa nahisgutang barangay nasikop sa gipahigayong hot pursuit operation sa mga polis nga gipangulohan ni SPO1 Arturo Andales sa Talisay City Police Station.

Ang nahisgutang dalagang biktima nga taga dakbayan sa Sugbo ang daling mitaho sa kapolisan sa maong hitabo ug maoy mitultol sa kapolisan ngadto sa balay ni Cañete hinungdan sa pagkadakop niini.

Si Andales nga nahinabi sa Banat News kagahapon mibutyag nga ang dalaga mianha sa balay sa iyang uyab nga silingan sa suspek ug nagkasabot nga mag-inom ang tulo diha sa gawas sa balay sa suspek.

Dihang nangahubog nakatulog ang tulo apan gikatahong gikamang sa suspek ang dalaga ug gilugos. Sumala pa sa mga polis wala makasukol ang dalaga ug wala makasiyagit pagpangayo og tabang tungod sa kahubog.

Matud ni Andales nga ang dalaga mipasangil nga milampos sa paglugos kaniya si Cañete hinungdan nga ilaha kining gi-refer nga magpa-medical examination aron makompirmar ang pasangil niini.

Si Cañete ang gikatakdang pasakaan og kasong pagpanglugos karong adlawa diha sa Talisay City Prosecutor’s Office. – BANAT NEWS