Puya gi-flush sa bowl

CEBU, Philippines - Usa ka puya nga presko pa ang hitsura naglutaw sa bowl sa pansayan sa usa ka boarding house nakapa-utingkay sa mga residente sa dalan Lopez Jaena, barangay Pari-an, kagahapon sa hapon.

Ang maong puya nga gituohang buhi pa sa dihang gi-flush sa bowl sa pansayan nagpangidaron og unom ka bulan ug usa kini ka lalaki.

Usa ka Donald Dy, boarder sa maong boarding house miasoy sa Banat News nga sa dihang migamit siya sa kasilyas, iyang gikatingala nga mibara ang bowl.

Si Dy miingon nga iyang gi-flush ang bowl tungod kay aduna man siya'y nabantayan nga tibogol sa dugo. Apan imbes suyopon sa bowl, aduna na hinuoy milutaw nga sa iyang panan-aw panit sa tawo.

Tungod sa katingala, gikuhit ni Dy gamit ang kawayan aron sutaon kun unsa ang panit nga nagkadugo.

Apan gikakurat ni Dy tungod kay bukton sa usa ka bata ang mitagbo sa iyang mga mata hinungdan nga iyang gitawag ang iyang asawa ug mao na kini nangayo og tabang sa kapolisan.

Sa pakighinabi usab sa asawa ni Dy nga si Bebot nagkanayon kini nga iyang pagduda nga buhi pa ang maong bata nga na-flush sa bowl tungod kay presko pa kaayo ang dugo niini.

Apan tungod sa pagsige niini og flush hinungdan nga nalumos kini ug namatay.

Gihulagway ni Bebot nga himsog ang maong bata nga lalaki diin ambongan usab kini ug sa dihang nahaw-as gikan sa bowl, presko kaayo ang panit niini.

Nagduda usab si Bebot nga kauban ra sa boarding house ang naglabay sa bata. Wala hinuon sila masayod kun gituyo ba sa pagpakuha o aksidenteng nakuha ang puya.

Matud usab sa usa ka Darwin nga nahinabi sa Banat News nga wala silay namatikdan nga adunay mabdos sa ilang dapit.

Si PO3 Michael Codaste sa Homicide Section nagkanayon nga dako ang posibilidad nga anaa magpuyo sa maong boarding house ang inahan sa puya.

Matud pa ni PO3 Codaste nga ilhon sa Homicide Section ang walay puangod nga inahan aron mapasakaan kini og tukmang kaso. (BANATNEWS)