70 anyos punggit sa awto

CEBU, Philippines - Patay ang usa ka 70-anyos nga tigulang babaye human kini madasmagi sa sakyanan sa dalan M.C. Briones sa barangay Maguikay, dakbayan sa Mandaue alas 10 pasado ang takna sa miaging gabii.

Ang namatay mao si Felomina Bugtai, minyo nga taga Pitogo sa lungsod  sa Consolacion ug ang nakadasmag mao ang awto nga gimaneho ni Ma. Flordiluna Tating Insomo, 25.

Si SPO2 Genaro Lambayan sa traffic section sa kapolisan sa maong dakbayan miingon nga milabang gikan sa pikas habig sa karsada ang biktima dihang napunggit sa sakyanan ni Insomo gikan sa Consolacion padulong sa dakbayan sa Sugbu.

Giingong wala makabantay ang biktima sa nagpadulong nga awto ingon man ang nagmanehong si Insomo nga kusog usab nga nagdagan.

Ang biktima kinsa nalamba sa karsada nakabaton og grabeng kadaut sa kalawasan ug daling gidala sa Cortes General Hospital apan gideklarar sa mga doktor nga dead on arrival.

Matud pa ni SPO2 Lambayan, si Insomo mitahan sa ilang buhatan apan gibuhian human magkasinabot sa mga kabanay sa namatay. (Romeo Limpangog)   (BANATNEWS)