Mag-uuma gihasi ni Fusilero
CEBU, Philippines - Midangop ug nagpatabang kang Cebu City Mayor Tomas Osmeña ang mga sakop sa Tabunan-Cantipla Farmers Association (TCFA) tungod sa giingong nagpadayon nga pagpanghasi ni retired general Tiburcio Fusilero ngadto kanilang mga mag-uuma.
Ang retired general maoy gitugyanan sa reforestation project sa protected areas sa bukirang mga barangay sa dakbayan nga naglakip sa Tabunan ug Cantipla.
Apan wala makauyon ang apektadong mga mag-uuma sa gihimo ni Fusilero tungod kay sila giingong gihasi niini aron mamahawa sa ilang nahimutangan.
Gani ang abogado sa TCFA nga si Atty. Kim Grace Mendoza miingon nga armado ang mga tawo sa retired general nga nanghulga sa mga mag-uuma.
“Nireklamo ta nganong kining mga goons ni Fusilero naa may M203, a very high powered firearm, naay .45 caliber, mao nang nangreklamo tawon ang mga mag-uuma sa ilang kinabuhi ug panginabuhian,” sumala ni Mendoza. Gikalipay hinuon sa mga mag-uuma ang ilang pagdangop ngadto sa mayor tungod kay kini giingong mipadayag nga motabang kanila.
Matud pa ni Mendoza nga nagplano si Osmeña nga butangan og detachment ang nahimutangan sa mga mag-uuma aron kini dili na mahasi.
Gani gipadayag sa mayor nga ang mga mag-uuma mismo maoy iyang papilion og kumander nga masaligan niini nga mangulo sa ibutang nga police detachment.
Plano usab ni Osmeña nga ipakanselar ang Memorandum of Agreement (MOA) tali kang Fusilero ug sa Department of Environment and Natural Resources (DENR).
Apan gitataw sa mayor nga iya unang ipasusi kung ang nangreklamo nga mga mag-uuma botante ba sa siyudad o dugay nang nagpuyo sa ilang dapit.
“I ask the council to go through the process of hearing them and just to come to a determination whether these people harassed are long time settlers in the area and to me the acceptable form of evidence is to find out if they have been a registered voter,” matod ni Osmeña. – BANAT NEWS
- Latest
- Trending
