Mag-uuma girapido patay

CEBU, Philippines - Patay ang usa ka mag-uuma human girapido sa mga armadong tawo ang pinuy-anan niining giabtan samtang naghigda paingon na untang matulog sa barangay Libo   lungsod sa Ronda niadtong Domingo sa alas 9:30 sa gabii.

Ang biktima mao si Alfredo Bautista, 67, molupyo sa nahisgutang lugar ug usa ka mag-uuma samtang   wala pa mailhi sa kapulisan sa paghimo ning balita ang mamumuno.

Matud ni PO2 Ricky Espinosa sa Ronda Police sa dihang nahinabi sa Banat News ang biktima paingon na untang matulog sa pinuy-anan sa higala niining si Cristito Labotin apan samtang naghigda na sila sa kawayan nga salog kalit lang mikasikas ang mga kahoy sa silong ug misunod ang butobuto sa mga armas.

Human sa buto-buto nakaangkon og daghang samad sa ubos sa suwang, liog nga milapos sa ulo ug samad pinusilan sa hawak dapit sa tiyan nga maoy nakaingon sa hinanali niining kamatayon.

Ang mirespondeng kapolisan naka-recover og walo ka kabhang sa bala sa kalibre .45, duha ka deformed slugs, usa ka kabhang sa .9mm pistol ug usa ka deformed slug sa .9mm ingon man tulo ka pellet sa 12 gauge shotgun sa crime scene. - BANAT NEWS