Tomas ikiha kun Cebu Zoo i-develop gyud

CEBU, Philippines - Pasakaan usab sa Kapitolyo    og laing kasong kriminal ug administratiba si Cebu City Mayor Tomas Osmeña ug ubang mga opisyal sa siyudad sa Sugbu   kun ipadayon ang pag-develop sa karaang Cebu Zoo sa may Camp Marina, Beverly Hills ning siyudad sa Sugbo.

Si Provincial Attorney Mariano Martinquilla nagkanayon nga ila na lamang gipaabut nga makapirma si Mayor Osmeña og Memorandum of Agreement (MOA) ngadto sa negosyante aron pag-develop sa Cebu Zoo ug pagbutang og mga kahayupan.

Si   Martinquilla miingon nga dili na makapanghilabot ang   siyudad sa yuta kay gipanag-iya kini sa kagamhanan sa lalawigan sa Sugbo.

Nagkanayon si   Martinquilla nga giandam na sa iyang buhatan ang tanang mga ebidensiya nga nagmatuod nga ang Kapitolyo maoy nanag-iya sa maong luna ug dili ang siyudad sa Sugbo sumala sa pangangkon sa mayor.

Dugang pa niini nga ang maong kasong giandam sa Kapitolyo usa lamang kini sa tubag sa hagit ni Osmeña nga ikiha siya ug ang siyudad tungod sa pagpunay og panghilabot sa mga isyu sa Kapitolyo bisan og walay labot ang siyudad. – BANAT NEWS