Tomas mipalag

CEBU, Philippines - Hinumduman karong adlawa ang unang anibersaryo sa pagbuto ug pagkahagsa sa PAF C-130, tail-4593 sa Samal Island, lalawigan sa Davao diin siyam ka kinabuhi sa mga sundalo ang nakalas ug pito niini mga residente dinhi sa Sugbu.

Matud pa ni Col. Ronnie Laguda ang direktor sa Operations Division sa 220th Airlift Wing nga karong adlawa mga alas 8:00 sa buntag adunay Santos nga Misa sa Airforce Base Chapel alang sa mga kabanay sa mga nabiktima.

Ang maong kalihukan dungan usab kini sa pagpahigayon og misa sa ubang mga sanga sa PAF lukop nasud gani ang 3rd Air Division sa Davao mopahigayon usab og misa sa dapit nga nahitabuan.

Gipasabot ni Col. Laguda nga gumikan sa ekonomikanhong krisis wala na sila motanyag sa mga sakop sa pamilya sa mga nangamatay nga moadto sa crash site.

Human sa misa ihatag usab ang mga "Information Kit" ngadto sa matag pamilya alang sa ilang angayang himuon pangandam pag-claim sa mga benepisyo.

Ang C-130 Tail 4593 gikan sa Davao Air Base padulong unta sa dakbayan sa Iloilo niadtong Agusto 25, 2008 sa gabii dihang kalit lamang mibuto ang maong abyon sa taas nga bahin sa Samal Island lalawigan sa Davao.

Duha ka opisyal ug pito ka mga crew ang nakalas sa maong abyon nga sila si PAF Maj. Mannuel Zombrano, co-pilot Capt. Adrian de Dios mga crew niini nga sila si SSgt. John Areola, SSgt. Aldrin Illustrisimo, SSgt. Gary Diñoso, SSgt. Felix Pedro Patriarca, SSgt. Patricio Claor, TSgt. Constantino Enrique Lubrigas ug TSgt. Petronilo Fernandez diin mga sakop kini sa 220th AW nga nagbase sa Mactan Benito Ebuen Air Base sa dakbayan sa Lapulapu. (Bong Soriano)   (BANAT NEWS)