Mga vendor mag-holiday Agosto 25

CEBU, Philippines - Gisugdan na pagpatuman sa Cebu City Market Authority ang “Vending Holiday” ngadto sa nagkadaiyang merkado publiko sa dakbayan.

Kini maoy gibutyag ni City Market Administrator Racquel Bohol-Arce aron mapatuman usab ang “Operation Linis” sa mga satellite market sa siyudad.

Ang vending holiday unang gipatuman diha sa Pasil Fish Market niadtong miaging adlaw diin walay mga vendor nga gitugotang makapaninda.

Lakip sa gilimpyuhan sa mga manindahay mao ang ilang mga pwesto, ingon man ang kanal sa nahisgutang merkado publiko ug uban pa.

Matud ni Arce nga ang Taboan Public Market (TPM) maoy ilang isunod pagdeklarar nga mag-vending holiday karong umaabot nga Agosto 25. Kini aron manglimpyo usab ang tanang mga manindahay sa palibot ug sulod sa maong merkado publiko lakip na sa ilang mga pwesto.

“Ang atong tumong niini nga mamintinar ang kalimpyo sa mga satellite market bisan kung kausa lang sa usa ka buwan mag-general cleaning ta,” sumala ni Arce.

Sa pikas bahin, gipahibawo usab ni Arce nga ila nang gipadalhan og 72 oras nga notisya ang labing minos napulo ka mga vendor diha sa TPM.

Kini alang sa boluntaryo usab nga pagguba sa ilang mga illegal structures nga gitukod sulod sa nahisgutang satellite market.

Nagkanayon si Arce nga kung magdumili ang mga vendor pagguba sa ilang gitukod nga mga estraktura, sila na ang mo-demolish niini.

Miingon si Arce nga ang maong lakang, kabahin sa ilang paglimpyo sa Taboan nga una nang gihulagway niini nga labing problemado nga satellite market sa siyudad.

Kini tungod kay ang nahisgutang merkado, gikataho nga gihimo usab nga lublobanan sa mga badlongon sa katilingban sama sa mga snatcher, kawatan, ug uban pa.

Una na hinoong gipadayag ni Arce nga sila seryoso sa paglimpyo sa TPM pinaagi usab sa hingpit nga pagpatuman sa market code sa dakbayan.

(Elly Bolonos)   (BANAT NEWS)