Eskapo nadakpan balik

CEBU, Philippines - Nasikop pagbalik ang binilanggo sa Cebu City Jail nga mieskapo niadtong miaging adlaw gikan sa tambalanan nga gidalhan kaniyaz human sa napulo ka oras nga pagtago-tago gikan nakaeskapo.

Ang inmate nga si Arnel Saladaga nakit-an ra sa mga jail guard diha sa Sudlon, Lahug ug gipaslak og balik sa Cebu City Jail.

Si City Jail Warden Supt. Efren Nemenio mibutyag nga iyang ipahiling sa doktor si Saladaga karong adlawa kung kini kinahanglan pa ba nga ibalik sa ospital.

Nasayran nga ang nahisgutang binilanggo una nang nieskapo niadtong miaging buwan diha sa CCJ apan nasakpan sa jail guard ug napusilan hinungdan nga gidala sa ospital, apan kini subling nieskapo ug nagmalampuson na sa laing higayon.

Kini pinaagi usab sa pagtangtang sa duha ka bolt sa leg iron nga gihikot sa tiil niini gamit ang katala nga wala mabantayi sa duha ka gwardiya.

Apan sa wala pa mapusili si Saladaga kini giingong nisuway usab pag-eskapo niadtong buwan sa Mayo dihang gidala ngadto sa hukmanan.

Si Saladaga nag-atubang og kasong paghupot og armas ingon man sa ginadiling drugas.

Sa pikas bahin, niingon si Nemenio nga gipaubos na sa jail restriction ang duha ka gwardiyang sila si JO1 Eugenio Torres ug JO1 Benjie Saking

nga maoy nagbantay kang Saladaga sa ospital atol sa pag-eskapo niini. – BANAT NEWS