Torture victim nanimalos

CEBU, Philippines - Biktimang giingong gigapos sa uyoang ‘druglord’ diha sa Talisay niadtong milabay'ng buwan nanimalos sa usa sa mga migapos kaniya, iyang gipusil patay diha sa sitio Trinidad sa barangay Punta Prinsesa ning dakbayan niadtong milabay'ng gabii.

Ang gipatay giila sa kapulisan nga si Emmanuel Samson, 18, taga Avocado St., barangay Mambaling ning dakbayan human makaangkon og mga samad pinusilan sa luyong bahin sa ulo.

Ang gitumbok nga suspek giilang si Joel Rey Basay alyas JR Basay, 23, kinsa na-rescue sa kapolisan sa Talisay gikan sa mga kamot sa mga gituohang mo-salvage unta kaniya samtang kini gigapos diha sulod sa usa ka tulo ka andanang balay sa Sea View Heights Subdivision barangay Lawaan 1 dakbayan sa Talisay niadtong miaging bulan.

Sa imbestigasyon nila ni PO3 Geoffrey Gutual, imbestigador sa Homicide Section sa Cebu City Police Office nga ang biktima ug higala niining si Jonas Ramos nagtan-aw sa videokehan   diha sa nahisgutang dapit niadtong tungura.

Gikatahong kalit nibutho si Basay diha sa ilang likod ug walay daghang pangutana gipusil niini ang luyong bahin sa ulo sa biktima ug daling misibat paingon sa barangay Mambaling.

Si Samson daling gidala sa Cebu City Medical Center apan pipila ka minutos nabugtuan kini sa iyang kinabuhi.

Ang inahan sa biktima nga si Emma mitug-an sa kapulisan nga sa wala pa mahitabo ang krimen, si Basay miadto sa ilang panimalay ug gipangita ang iyang anak ug dihang nahibaw-an niining wala didto ang iyang anak nagpasalba pa kini makausa ka higayon.

Si Emma ug ang iyang kapuyong si Junie Abordo daling nangita kang Emmanuel aron pahibaw-on kini apan naunhan sila sa suspek pagpangita sa iyang anak sanglit ilaha nalang kining nasugatan sakay sa traysikad atol na diay sa iyang pag-ikyas.

Si Samson usa sa gikasuhan ni Basay tungod sa pagdagit, pagbinaklid ug pag-torture kaniya kuyog ang uyoan ni Basay nga giingong druglord sa Talisay nga si Marino “Inok” Lawis ug usa ka naila lang nga “Tawiwa.”

Gikatahong nasuko si Lawis kang Basay tungod sa pagduda niining iyang gitambling ang halin sa illegal drugs niini. – BANAT NEWS