Lpg mibuto panadero naangol

CEBU, Philippines – Nalandig sa tambalanan ang usa ka 24-anyos nga panadero human mobuto ang tangke sa liquefied petroleum gas sa gitrabahoang bakeshop diha sa sitio Sangi, barangay Tabunok, dakbayan sa Talisay kagahapon sa kaadlawon.

Ang biktima nga gidali og dala sa Talisay City District Hospital giilang si Predexon Deliaga tungod sa naangkong third degree burn sa iyang lawas.

Ang biktima daling gipasakay og traysikol sa iyang mga kauban paingon sa tambalanan apan tungod sa kahimtang niini gibalhin ngadto sa Vicente Sotto Memorial Medical Center.

Si Talisay City Fire Marshal, Felipe Canillas sa pakighinabi sa Banat News mibutyag nga si Deliaga uban sa iyang kaubang babayeng giila lang sa ngalan nga “Marisol” nagdungan pagsulod sa bakery.

Matud pa niini, nakatimaho si Marisol og gas hinungdan nga mibalik kini og gawas dayon balik ngadto sa iyang boarding house.

Apan si Deliaga misulod ngadto sa baking area ug gipasiga ang oven ug diha-diha kalit nga miulbo ang tangke sa gas, gituohan sa kabomberuhan nga gidakop sa gas ang kalayo sa oven hinungdan sa pagbuto sa tangke.

Gumikan sa kakusog sa pag-ulbo naguba ang roll-on, roll-up nga pultahan sa bakery ug nahugno ang kisame.

Si Marisol nga mibalik sa bakery nakurat nalang pagkakita kang Deliaga nga nagbuy-od na diha sa sawog hinungdan nga dali niya kining gitabangan ug gidala sa tambalanan.

Si Canillas midugang nga mikabat ngadto sa P30 mil ang danyos sa maong aksidente. – BANAT NEWS