Mandaue police pasidunggan

CEBU, Philippines – Giandaman og pasidungog sa kagamhanan sa dakbayan sa Mandaue ang iyang mga kapolisan gumikan sa daling kasulbaran sa tulis sa LBC Express sa dalan M.C. Briones sa barangay Guizo, sa maong dakbayan niadtong miaging Lunes.

Ang maong pasidungog unya na madawat sa kapolisan sa kasaulogan sa ika-40 ka tuig nga Charter Day sa dakbayan sa Mandaue sa umaabot nga Agosto 30 niining tuiga.

Gibutyag kini ni Eric Mendoza, presidente sa Mandaue Chamber of Commerce and Industry (MCCI) atol sa kasaulogan sa Mandaue Business Month didto sa Cebu International Convention Center (CICC)

Ang duha sa upat ka mga suspetsadong mitulis sa LBC Express nadakpan sa hiniusang operasyon sa mga sakop sa Investigation Detection ang Management Bureau (IDMB) ug Theft and Robbery Section (TRS) sa Mandaue City Police Office (MCPO).

Ang mga nadakpan mao sila si Esteve Go alyas Harry, 31 ug Jhunmar Isales, 19. Si Isales maoy misulod sa counter ug mipusil patay sa kawani sa LBC nga si Eugenio Agmata. – Romeo T. Limpangog (BANAT NEWS)