Mga pari pabalikon sutana dili ok

CEBU, Philippines – Dili uyon ang pipila ka mga opisyal sa Artsidoyesis sa Sugbo nga ibalik ang naandang batasan sa kaparian kaniadto nga kanunay nga magsul-ob og sutana aron mailhan gyud sa publiko nga usa kini ka pari.

Ang maong sugyot mitumaw human sa pag-angkon sa mitulis ug mipatay ni Fr. Jovencio Rabusa didto sa South Coastal Road, Cansojong siyudad sa Talisay niadtong Lunes sa gabii nga si Rosel Ravanes, 28 anyos nga kun nagpaila pa lamang nga pari ang iyang biktima dili unta kini niya pusilon.

Si Msgr. Achilles Dakay, tigpamaba sa Archdiocese sa Sugbu nga ang pagsul-ob og sutana sa kaparian dili maoy tubag nga dili biktimahon sa mga tulisan ug mga kriminal ang mga pari.

Kini tungod kay siya nagtuo nga ang mga kriminal dili moila og si bisan kinsa ma-pari man o dili kay maghari sa alimpatakan sa mga kriminal ang kwarta nga ilang makuha ug ang intensyon nga mopatay.

Gihimong sanglitanan ni Dakay mao ang bag-o lamang nahitabo nga pagpamomba sa giingong mga miyembro sa Moro Islamic Liberation Front sa simbahan sa Immaculate Concepcion Cathedral sa Cotabato City nga mikalas og mga kinabuhi ug daghan ang nangaangol.

Matud pa ni Dakay nga may pipila usab ka okasyon nga may pari nga nagsul-ob og sutana unya nagsaulog pa sa Santos nga Misa apan gipusil-patay gihapon sa mga kriminal nga may dautang intensiyon gyud kaniya.

Gisugyot hinuon ni Dakay nga ang mas maayong buhaton mas pahugtan pa ang seguridad sa kapolisan sa matag lungsod aron mahadlok ang mga kriminal sa paghimo og krimen dili lamang ngadto sa mga kaparian.

Samtang gidasonan usab si Msgr. Esteban Binghay, episcopal vicar sa Archdiocese sa Sugbu, ang baruganan ni Msgr. Dakay nga nagsupak sa pagsul-ob kanunay sa kaparian og sutana aron dili na masubli pa ang nahitabo ni Fr. Rabusa. – Chester Abadilla (BANAT NEWS)