Kaskaserong police drivers palakton

CEBU, Philippines – Mga kaskaserong police sa mga patrol cars ingon man service vehicle sa Cebu City Police Office parelibuhan ug ibutang sa laing units nga ang trabaho manglakaw sa pag-duty.

Kini maoy gipahibalo ni Sr. Supt. Patrocinio Comendador hepe sa kapulisan sa dakbayan sa Sugbu tungod sa report nga duna gihapoy mga police drivers sa nga kaskasero ug mopaturatoy lang sa pagpadagan sa ilang sakyanan bisan walay alarma.

Matud pa niini nga angayang ampingan ang maong mga sakyanan ug gikinahanglang mosunod sila sa lagda sa trapiko gawas lang kung dunay alarma.

Si Comendador mimando lang og 15 kilometros matag oras ang pagpadagan sa mga patrol cars ingon man sa ilang ubang gigamit sa administrative function panahon nga walay alarma.

Kalabot gihapon niini, ang General Services Office (GSO) sa Cebu City Hall naglaraw nga himuon nang requirement sa kapulisan sa siyudad ang pagkuha og clearance gikan kanila kung kini moretiro sa serbisyo o ibalhin ngadto sa laing dapit.

Kini pinaagi usab sa pagpinirmahay ug Memorandum of Agreement (MOA) tali sa City government ug sa kadagkuan sa kapulisan sa dakbayan.

Ang labaw sa GSO nga si Ester Cubero nakahuna-huna sa maong lakang, tungod sa kalisdanan pag-recover sa mga armas nga gi-issue sa kapulisan.

Matud pa ni Cubero nga pinaagi sa pirmahan nga MOA mapugos na ang mga polis pagpangayo og clearance sa City Hall una moretiro o mobalhin sa laing lugar.

Sa ingon niini nga paagi niingon ang labaw sa GSO nga siguradong mauli ang armas sa polis nga gi-issue sa siyudad kung kini wala na sa serbisyo o ibalhin ug distino.

Lakip unya sa pakuhaon og clearances kadtong pamilya sa mga polis sa dakbayan nga mamatay sa serbisyo.

Nasayran nga ubay-ubay’ng matang sa kalibre sa armas nga gipalit sa city government nga kasamtangang gipagamit sa kapulisan sa dakbayan.

Kini naglakip sa kalibre 45, kalibre 40, .38 revolvers , 9mm pistols, 357 revolvers, Armalite rifles ug uba pa, samtang kapin sa 30 usab ka mga sakyanan ang gipagamit sa dakbayan alang sa kapolisan. – Guamittos Logroño uban sa report ni Elly Bolonos (BANAT NEWS)