Kisame sa department store nahagsa

CEBU, Philippines – Milagubo ang tibuok kisame sa usa ka dakong department store sa dakbayan sa Lapulapu dihang nahunlak kini gumikan sa kahuyang sa pagkatrabaho niini og maayo nalang kay walay kinabuhi nga naangin sa miaging hapon.

Matud pa ni Lapulapu City Fire Marshall F/CInsp. Recardo Cornellio nga kun lig-on pa lang unta nga pagkatrabaho ang maong kisame makapiog unta kini sa bug-at   nga instalasyon sa kuryente ilawom sa kisame nga maoy hinungdan sa pagkalusno niini dapit sa may grocery area.

Dungan sa maong pagkahugno, mibanaw usab ang bagang tubig sa sawog sa maong tindahan kay naputol usab ang tubo sa tubig nga didto maglatay sa ilawom sa kisame.

Gumikan niini mibahad si CInsp. Cornellio nga dili nila lung-an ang maong tindahan hangtod nga makatuman ang tag-iya niini sa mga panginahanglan alang sa kaluwasan sa katawhan nga mamalit sa maong tindahan. – Bong Soriano (BANAT NEWS)