Balay ni Ruiz giralihan

CEBU, Philippines – Giralihan sa mga militanteng grupo sa miaging adlaw ang balay ni Kongresista Neriza Soon Ruiz sa dakbayan sa Mandaue gumikan sa pagsuporta sa maong kongresista sa Constitutional Assembly (Con-Ass).

Ang mirali mao ang grupo sa mga batan-on nga mga miyembro sa Sanlakas agi'g pagpakita nga wala sila makauyon sa gihimo ni Kongresista Ruiz dihang mitabang kini pagduso sa House Resolution 1109 nga nag-umol sa Con- Ass. Matud pa ni Aaron Pedrosa, ang nangulo sa maong protesta nga gikombinse nila ang kongresista sa ika-unom nga distrito, nga moatras sa iyang suporta sa Con-Ass.

Si Pedrosa nagkanayon nga dili sila mohunong sa pagrali atubangan sa balay ni Ruiz sama sa ilang gihimo sa atubangan usab sa balay ni Cebu City South District Congressman Antonio Cuenco hangtud nga paminawon ang ilang hangyo.

Gipasabot sa grupo ngadto kang Ruiz ug Cuenco ug uban pang mga kongresista nga kaalyado sa administrasyon, nga personal ug pamolitika ra ang tumong sa Con-Ass aron lang sila magpabilin sa ilang katungdanan kauban si Presidente Gloria Macapagal Arroyo.

Dako ang ilang pagtuo nga mahimong mausab pa ang baruganan ni Ruiz ug Cuenco ingon man ang ubang mga Sugbuanong kongresista nga misuporta sa Con-Ass. – Chester Abadilla (BANAT NEWS)