Kapin 400 stalls gideklarar bakante

CEBU, Philippines – Hingpit nang gideklarar sa Cebu City Market Authority nga bakante ang ubay-ubay nga mga stalls sa kamerkaduhan sa dakbayan sa Sugbu.

Kini human molapas ang gipadala niini nga notisya ngadto sa gatusan ka mga stallholders gikan sa napulo ka satellite market sa siyudad.

Partikular nga mga stalls nga gibakante mao kadtong gipanag-iya sa mga manindahay nga napakyas pag-renew sa ilang contract of lease.

Matud ni City Market Administrator Racquel Bohol-Arce nga igo lang nila nga gipatuman ang nalatid sa market code sa dakbayan.

“Mao may patakaran nga once dili ka-comply sa contract of lease i-consider ang stalls nga vacant unya ni-lapse na man ang atong gipadala nga notice to vacate,” sumala ni Arce.

Una nang gibutyag sa market administrator nga mokapin sa 470 ka mga stallholders ang napakyas pag-renew sa ilang kontrata sulod sa gihatag nga tagal.Miingon si Arce nga sa sunod semana, ila na nga pangsirad-an ang maong mga stalls aron mahibaw-an sa ubang interesado nga kini mga bakante.

“Anytime next week we will close the stalls na para makita sab sa uban basin dunay maka-interes unya moapil sa atong ipahigayon nga bidding of stalls, dugang ni Arce.

Nagkanayon ang market administrator nga posibleng mapahigayon na ang bidding alang sa mga vacant stalls sa sayong bahin sunod buwan.

Matud ni Arce nga lakip unya nga ipaubos sa bidding mao ang kapin usab sa 400 ka mga stalls sa nagkadaiyang satellite market nga nagpabiling bakante hangtod karon.

Kadaghanan niini anaa mahimutang sa Taboan Public Market nga giila sa market administrator nga labing problemado nga merkado sa siyudad.

Kini tungod kay ang nahisgutang merkado publiko gikatahong gilubloban sa mga kawatan, snatchers ug sa ubang badlongon sa katilingban.

Malaumon hinuon si Arce nga sa bag-o niyang gibutang nga market supervisor sa Taboan, mahibalik ang kahapsay niini sa mosunod nga mga adlaw. – Elly Bolonos (BANAT NEWS)