Kawat sa krudo sakpan

CEBU, Philippines – Arestado ang usa ka drayber sa usa sa mga Board Member sa Kapitolyo human maaktuhing mibaligya og krudong gitubil na diha sa sakyanan sa gobiyerno ngadto sa usa ka pasaheroang jeepney sa barangay Kalunasan kagahapon.

Sa ekslusibong report sa TV Patrol Central Visayas kagahapon giila ang drayber sa Kapitolyo mao si Ronald Cariñosa, giingong drayber ni Bokal Peter Calderon ug nagmaneho sa itom nga pickup nga may government plate nga SHI-458.

Lakip sa naabtan mao ang drayber sa jeepney nga mopalit sa maong krudo nga si Nemchito Gulbe nga nagdala sa pasaheroang may plakang GVS-811.

Ang suspek nadakpan sa akto sa usa ka polis nga sakop sa intelligence unit sa Police Regional Office -7 nga nagpasuyop sa krudo sa maong pickup ngadto sa duha ka mga container aron ibaligya kang Gulbe.

Giangkon hinuon sa duruha ang ilang kalapasan, si Cariñosa nagtuong mataktak gyud siya sa iyang trabaho samtang si Gulbe miangkong mas barato gyud hinuon ikumparar ang presyo sa krudong “sinuyop” gikan sa mga sakyanan sa gobiyerno kun itandi sa presyo sa gasolinahan.

Wala hinuon mabutyag sa report kun pilay palit niini sa matag litro. - Edwin Ian Melecio (BANAT NEWS)