Suspek sa panigbas mitahan

CEBU, Philippines – Usa ka suspetsado sa pagpanigbas sa iyang silingan sa sitio Camp 6, barangay Manipis, dakbayan sa Talisay mitahan ngadto sa mga opisyal sa barangay niadtong Huwebes sa hapon ug karon nagpahayahay na sa prisohan sa maong dakbayan.

Si Marcos Montejar alyas “Macoy”, 40, nga taga Campo 6, migamit sa iyang sundang ug gihabas si   Rimson Encallado, 22 , nga iyang silingan gumikan lang sa walay hinungdang lalis.

Si SPO3 Joel Wenceslao sa alert team ug PO2 Lino Diez sa Talisay City Police Station mibutyag sa Banat News nga si Encallado miadto sa balay ni Montejar kay nanukmat bahin sa panaglalis sa naulahi ug sa iyang(Encallado) inahan sa milabay’ng mga adlaw.

Apan mikulisiw si Montejar sa kasuko ug imbis tubagon og tinarong si Encallado, mikuha hinuon kini og sundang ug gipanigbas ang biktima.

Nabulit sa mga samad tinigbasan ang kalawasan ni Encallado busa dali kining gihatod ngadto sa Vicente Sotto Memorial Medical Center sa dakbayan sa Sugbo.

Si Montejar misibat dayon human sa hitabo apan human sa pipila ka oras ,mitahan sa iyang kaugalingon ngadto sa usa ka konsehal sa barangay kinsa mao usab ang mitugyan kaniya ngadto sa kapolisan.

Sa laing bahin, usa ka 25-anyos nga lalaki giluba og ice pick sa gikalalis niyang tawo didto sa merkado publiko sa barangay Tabunok, dakbayan sa Talisay kagahapon sa kaadlawon.

Ang biktima mao si Joel Samblante, taga barangay Lagtang samtang ang suspetsado nailhan lang sa angga nga “Adat”.

Nasayran gikan sa kapolisan nga sa sayo pa si Samblante nakig-inom sa iyang mga higala diha ilawom sa flyover sa Tabunok.

Apan dihang nahubog na, giingong misulod kini sa merkado diin iyang nahinagbo ang suspetsado ug miulbo dayon ang ilang panaglalis ug dihang gilupig sa katarungan ang suspetsado, wala na kini ikatubay sa lalis busa milanit siya sa iyang ice pick ug gihansakan ang biktima.

Ang biktimang walay praktis bahin sa panagang natusak sa mga samad agi sa ice pick ang kalawasan niini ug gihatod usab dayon ngadto sa Vicente Sotto Memorial Medical Center sa dakbayan sa Sugbo, samtang ang suspek gipangita pa sa kapolisan kay misibat dayon kini human sa hitabo. - Brenda D. Batuto (BANAT NEWS)