Tanod nakuryentihan patay

CEBU, Philippines - Patay diha diha ang usa ka tanod human makuryentihe samtang nag-roving human sa gipahigayong koronasyon atol sa kapistahan didto sa barangay Anapog, lungsod sa Pinamungajan niadtong Martes sa alas 3 sa kaadlawon.

Ang namatay diha-diha mao si Benidecto Biro, 21, minyo, nagpuyo sa maong dapit ug usa ka tanod sa maong barangay.

Matod ni PO2 Gilfred Baruman sa Pinamungajan police station dihang nahinabi sa Banat News si Biro nagpatrolya sa palibot sa sports complex pagsusi sa mga tawo nga naghuboghubog sa maong lugar.

Nasayran nga dunay gipahigayong koronasyon nianang pagkagabii nunot sa kapistahan sa nahisgutang lugar.

Subay sa inisyal nga imbestigasyon samtang nag-roving ang maong tanod nga na-atol usab nga nag-uwan-uwan aksidente kining nakagunit sa puthaw nga lamppost sulod sa basketball court ug diha-diha nakit-an nalang sa mga saksi nga mikirig human makuryentihe.

Usa ka Jonathan Tango-an, silingan sa biktima dali unta dayong mitabang ni Biro apan mao na usab kini ang nakoryentehan dihang mibira sa biktima hinungdan nga wala nalang kini mopadayon ug didto modagan sa plangka aron patyon ang suplay sa kuryente.

Apan sa dihang napawong ang kuryente nasuta nga namatay gyud ang biktima human manglagum na kini ilabina ang walang bukton niini nga maoy mipilit sa lamppost.

Nasuta usab sa gihimong imbestigasyon nga dunay paksit ang wire sa kuryente nga didto magsubay sa yuta nga nalunopan sa tubig niadtong higayona ug mi-ground sa lampost.

Pag-responde sa mga polis migahi na ang patay’ng lawas sa biktima nga nanglagum ug wala nalang kini dad-a pa sa tambalanan. - Darrel A. Carumba(BANAT NEWS)