Drayber sa Rough Rider gisusi

CEBU, Philippines – Gisusi karon sa kapolisan kun ang drayber sa Rough Rider bus nga nakaligis ug nakapatay niadtong adlaw’ng Biyernes sa Danao City kung mao ba gihapong drayber nga nakaligis ug nakapatay gihapon og bata niadtong 2007 sa Daanbantayan.

Ang drayber giilang si Gerald Omolon nakaligis-patay sa nagmotorsiklong si Ronnel Manggas Batican sa barangay Poblacion, dakbayan sa Danao niadtong adlaw’ng Biyernes.

Si Omolon ang boluntaryong misurender ngadto sa mga polis human sa maong hitabo.

Apan si Chief Insp. Jovito Canlapan ang bag-ong hepe sa San Fernando Police Station pagkabasa sa balita sa Banat News niadtong adlaw’ng Domingo daling mitawag ug mipahibalong dunay drayber gihapon sa maong bus company nga may pangalang Gerald Omolon ang napasakaan og kasong reckless imprudence resulting to homicide in relation with Child Abuse niadtong Nobiyembre tuig 2007.

Kini human makaligis ug nakapatay sa usa ka 6-anyos nga batang babaye sa barangay Malingin lungsod sa Daanbantayan apan hangtud karon walay warrant of arrest gikan sa korte nga migawas alang sa iyang pag-aresto.

Si Canlapan nagkanayon nga niadtong nakaligis og bata si Omolon siya pa maoy hepe sa Daanbantayan Police Station.

Ang suspetsado ang nabuhian nila tungod kay naabtan sila sa oras gumikan usab kay ang mga ginikanan sa bata wala dayon makapasaka og kaso batok kaniya.

Si Omolon ang gipaubos sa preliminary investigation sa maong hitabo apan wala kini moduso og counter affidavit sa kaso nga gipasaka batok kaniya.

Matud ni Canlapan nga sa maong wala pagtubag ni Omolon si Fiscal Jane Petralba ang miluwat og resolution sa kaso niadtong Marso 2008. - Brenda Batuto (BANAT NEWS)