Gay rights group migimok

CEBU, Philippines – Nagsugod na pagsuroy-suroy sa pipila ka bahin sa nasud ang gay rights group nga gitawag og Ang Ladlad pag-establisar og mga regional chapters.

Gani ang maong grupo nga giingong gilangkuban usab og mga tomboy, bisexual ug transgender, miduaw dinhi sa Sugbo sa miaging semana.

Gipadayag sa chairperson sa Ang Ladlad, Danton Remoto, nga gusto nilang subli nga magpa-accredit sa Comelec isip usa ka party-list group.

Kini aron duna na silay representante sa kongreso nga magdala sa tingog sa ilang mga miyembro kun modaog sa umaabot nga eleksyon.

Partikular na niini ang pagpalabang og mga balaudnon sama sa ilang dugay na nga gihangyo nga mapasar nga anti-discrimination bill. 

Apan karon pa lang duna nay grupo usab nga nagplanong mobabag sa tinguha sa nahisgutang pundok nga dili makahuygo sa ilang tinguha.

Kini mao ang Human Life International (HLI) nga gipanguluhan sa country director niini nga si Dr. Rene Joseph Bullecer.

Alang kang Bullecer wala na kinahanglana ang gipangayo sa Ang Ladlad tungod kay kini giingong napatik na sa batakang balaod sa nasud (Bill of Rights).

Gani miingon ang country director sa HLI nga kini maoy hinungdan nganong gibasura sa Comelec ang aplikasyon niini sa nakalabay nga piniliay.

Nabalaka si Bullecer nga adto sa kongreso magsaba-saba ang maong grupo kung kini mahatagan og kahigayunan nga makasulod sa Ubos Balay Balauranan.

Ang labaw nga gikabalak-an sa HLI country director nga ipamugos unya sa nahisgutang pundok ang same sex marriages (gay marriages).

Tungod niini miingon si Bullecer nga sila mohimo usab og mga lakang nga dili ma-accredit sa Comelec ang maong grupo.

“Kung mao gihapon na ang ilang stand just to reinforce sa ilang agenda nga mao ang pag-fight sa non-discrimination bill, unya ultimately towards gay marriages, maningkamot ta to make some actions nga dili na sila ma-accredited sa Comelec,” sumala ni Bullecer. - Elly Bolonos (BANAT NEWS)