Video karera sige pa sa Talisay

CEBU, Philippines – Ang hepe sa kapolisan sa dakbayan sa Talisay nga si Superintendent Henry Binas miprangka nga dili siya makasiguro nga wala nay mga nagnegosyo og video karera ug masiao diha sa Talisay busa hugot ang ilang pagpaniid niini.

Kini tungod sa giingong gisagop sa mga financier ang‘guerilla type’ kon tago-tago nga paagi sa pagpadagan sa video karera ug masiao.

Hinuon nasikop sa kapolisan si Jose Regner Simbajon, 40, taga sitio Torre, barangay Inayawan, dakbayan sa Sugbo nga nangolekta og tally sheet sa masiao sa usa ka balay sa barangay San Isidro, dakbayan sa Talisay sa miaging adlaw.

Gawas kang Simbajon may ginganlan pa og “Roy” kinsa gikatahong financier sa masiao, puwerting idlasa ug nakaikyas kini sa kapolisan apan napasakaan gyud og kaso sa mga polis sa buhatan sa piskaliya sa siyudad.

Si Roy kinsa taga Minglanilla apan didto magpadagan sa iyang masiao nga negosyo sa barangay Maghaway, Talisay. - Brenda D. Batuto (BANAT NEWS)