Briton Ok Na, Pinoy Gi-Quarantine Pa

CEBU, Philippines – Ang 26-anyos nga British national nga miabot dinhi sa Sugbo apan gipa-ilawom sa quarantine tungod sa gikalisangang swine flu o A(H1N1) virus, samtang wala pay resulta kalabot sa usa ka Pilipino nga gikan sa Hong Kong.

Si assistant regional director Lakshmi Legaspi sa Department of Health nagkanayon nga walay nakita nga swine flu virus sa lawas sa maong babayeng Briton, apan usa lang ka yano nga viral infection.

Ang maong Briton naabot dinhi sa Sugbo gikan sa Mexico.

Kagahapon, gi-release na kini gikan sa isolation room sa Vicente Sotto Memorial Medical Center.

Si Legaspi nagkanayon nga wala na hinuoy hilanat ang Pilipino nga usa ka overseas worker nga gi-quarantine, apan angay pa nga paabuton ang resulta sa test niini.

Subay niini, nangangkon si Legaspi nga negatibo ang Sugbo gikan sa makamatay nga influenza A (H1N1) virus.

Si Dr. Gerardo Aquino, direktor sa VSMMC, nagkanayon nga bisan sa presensiya sa mga tawong gi-quarantine, nagpabiling normal ang ilang operasyon ug walay kabalaka gikan sa ubang mga pasyente sa ospital.

Apan kagahapon, naalarma ang mga tinugyanan sa Bureau of Quarantine human usa ka Amerikano ug usa ka Pilipina nakita sa thermal scanner nga adunay taas nga temperatura hinungdan nga gipa-ubos sa dali nga medical check-up.

Si Dr. Filbert Moga, duty doctor sa BOQ-7 sa MCIA, nagkanayon nga ang Amerikano mirehistro og 36.8 degrees Celsius, samtang ang Pilipina mirehistro og 37.1 degrees Celsius.

Ang Amerikano gikan sa Boston ug miagi sa San Francisco dayong agi sa Hong Kong, samtang ang Pilipina gikan sa Hong Kong. Sakay sila sa Cathay Pacific flight CX 921 nga naabot kagahapon sa alas 11:30 sa buntag.

Apan sa dihang gipaubos sa eksaminasyon, nasuta nga normal ra hinuon ang gipamati sa panglawas niini.

Human sa tukmang proseso, gi-release ang Amerikano ug Pilipina. – BANAT NEWS