Teddy suportado

CEBU, Philippines - Mga barangay kapitan sa lungsod sa Consolacion   mipadayag sa ilang suporta kang kanhi Mandaue City Mayor Thadeo Ouano kun mahinayon kini sa iyang pagkandidato sa pagka kongresista sa ika-unom nga distrito sa lalawigan sa Sugbo.

Kini ang nasayran kang barangay Kapitan Rey Cataluna sa barangay Nangka sa nahisgutang lungsod sa dihang nahinabi sa Banat News niadtong miaging adlaw.

Si Cataluna mipasabot nga hugot nilang paluyohan ang kanhi mayor sa dakbayan sanglit gikinahanglan kaayo nga mapakaylap ang kalamboan sa dakbayan sa Mandaue sa tibuok ika-unom nga distrito.

Dugang pa ni Cataluna nga si kanhi bokal Gabriel Luis Quisumbing maoy mahimong lig-on nga ikaatbang ni Ouano kun mobalik kini sa pagkandidato sa pagka kongresista sa ika-unom nga distrito sa 2010 election.

Si Quisumbing maoy gikasakbang ni   Nerissa Soon-Ruiz sa 2007 election apan napilde.

Si Soon-Ruiz nga anaa na sa iyang katapusang termino karon hayan   mokandidato   pagkamayor sa dakbayan sa Mandaue sa 2010 election ug mosakbang sa incumbent nga si Mayor Jonas Cortes nga magpasubli usab sa iyang ikaduhang termino. - Romeo T. Limpangog (BANAT NEWS)