Mag-uuma gipatay

CEBU, Philippines – Patay ang usa ka mag-uumang gikan pa sa husay sa barangay human kini gibanhigan ug namatay samtang nagkuyog sa iyang kapuyo pauli sa ilang balay diha sa barangay Cabalawan lungsod sa Sogod niadtong Miyerkules sa alas 11:45 sa buntag.

Ang namatay mao si Rolando “Allan” Latosa, 39, ulitawo apan dunay kapuyo human maigo sa tunga-tungang bahin sa dughan dihang gipusil   ni Gerry “Titig” Garido Cejano, 20, uban sa manghod niining si Jason.

Matud pa ni PO3 Elymar Mendoza sa Sogod police dihang nahinabi sa Banat News mao pay pagkahuman sa husay sa kaso sa biktima ug ni Jason ug padulong na pauli dihang nahitabo ang pagpamanhig.

Ang kapuyo sa biktima nga si Ellen Montecillo miila sa mga suspek nga maoy mibanhig sa iyang kapuyo, gikatahong nagkaaway niadtong milabay'ng Lunes ang biktima ug si Jason hinungdan nga nag-abot sila sa barangay alang sa husay.

Apan wala masulbad ang maong kaso hinungdan nga nagkasabot nga isibog kini sa umaabot nga adlaw'ng Sabado hinungdan nga nanguna og panglakaw ang biktima ug kapuyo.

Nakugang nalang ang duha paghiabot sa maong lugar nga nagpaabot na ang mga suspek ug dihang duol na sila sa duha kalit nga gidiretso og pusil sa dughan si Latosa.

Bisan pa og samaron nakadagan pa ang biktima pahilayo samtang nagpunay og singgit pagpangayo og tabang si Montecillo hinungdan nga mikaratel og dagan ang mga suspek.

Ang mga estambay nga sila si Hector Montecalbo, Tomas Monasque, Jessie Monsolen ug Nilo Sodaria nga nakadungog sa pagpakitabang sa babaye daling misusi sa dapit ug mitabang pagdala sa nagkadugong biktima ngadto sa tambalanan apan nabugtoan gyud kini sa iyang kinabuhi.

Gituohan sa kapulisan nga milaban ang suspek sa manghod niining gikabangi sa biktima sa barangay. Ang kapulisan padayon pa sa ilang hot pursuit operation pagdakop sa suspek nga daling nakasibat human sa hitabo. (Darrel Carumba) (BANAT NEWS)