Call Center agent naghikog sa hotel

CEBU, Philippines - Patay na nga nadiskubrehan kagahapon sa buntag sa sulod sa usa ka hotel diha sa sitio Humay-Humay barangay Gun-ob dakbayan sa Lapulapu ang usa ka tawo kinsa gituohang naghikog pinaagi sa paghigot og hose sa tubig sa liog. 

Ang namatay mao si John Israel Ladiao, nga giingong call center agent sa Teletech sa dakbayan sa Mandaue base usab sa ID nga nakuha sa kwarto.

Si SPO4 Rolito Jumao-as, imbestigador sa Homicide Section sa kapolisan sa maong dakbayan nga nahinabi sa Banat News nagkanayon nga ang housekeeping sa maong hotel nga si Marilou Lozada maoy nakadiskubre   kang Ladiao.

Si Lozada padulong na untang manglimpyo dihang nakit-an si Ladiao nga nagbitay na sa railing sa hagdanan padulong sa taas ug wala nay kinabuhi.

Nasayran sa kapolisan nga niadto pang Pebrero 12 mi-check in ang biktima ug mokabat na sa P391,000 ang balayranan niini.

Base sa nakuha nilang kasayuran sa mga kawani sa maong hotel nga niadtong miaging adlaw ila nang gihinginlan sa billing si Ladiao.

Si SPO4 Jumao-as nagkanayon nga nakakuha sila og dokumento nga promisory note nga gituuhang iya ni Ladiao nga naghangyong P300,000 lang una ang iyang bayran samtang ang balanse ipaulahi nalang niya og bayad.

Sa pagkakaron ang unang gidudahang rason kun ugaling naghikog man si Ladiao mao ang kadako sa balayranan niini pagpuyo sa maong hotel. - BANAT NEWS