Mamulkitay og ligid gisuyaan gi-shotgun

CEBU, Philippines - Nalandig sa tambalanan ang usa ka 31-anyos nga lalaki human gi-shotgun tungod sa giingong kasina niadtong Biyernes sa gabii diha sa barangay Lawaan II, dakbayan sa Talisay.

Ang biktima giilang si Renie Aseu usa ka trabahante sa vulcanizing shop sa nahisgutang lugar nakaangkon og samad pinusilan sa tuong bahin sa likod sa iyang abaga ug nadala sa Talisay City District Hospital apan gibalhin kini ngadto sa Vicente Sotto Memorial Medical Center.

Ang suspetsado mao si Efren Oros alyas “Sarding” taga barangay Lawaan III sa nahisgutang siyudad kinsa nasikop kagahapon sa buntag sa gipahigayong hot pursuit operation nila ni SPO3 Joel Wenceslao sa homicide section sa kapolisan sa Talisay. Sa imbestigasyon ni PO2 Lino Diez usa sa ilang gidudahang motibo mao ang kasina tungod kay si Oros duna say vulcanizing shop tupad sa gitrabahoan sa biktima.

Sa wala pa ang pagpamusil gikatahong nag-inom si Oros diha sa shop niini ug gibato ang biktima hinungdan nga giduol kini sa naulahi ug gipangutana, apan walay mitubag sa grupo hinungdan nga mitalikod si Aseu apan gikalitan kini og pusil sa suspek. Si Oros ug kauban daling mibiya sa lugar apan nadakpan kini sa iyang balay sa Lawaan III. - Brenda Batuto (BANAT NEWS)