Anak Sa 'Druglord' Nanulis, Sikop

CEBU, Philippines - Anak sa gipasanginlang druglord ug notadong tulisan sa Sugbo nasikop sa mga sakop sa kapolisan human gikatahong nanulis sa usa ka PUJ alas dos sa miaging kaadlawon sa General Maxilom Avenue, Sitio Tierra Cora, barangay Tejero.

Ang nadakpan giila nga mao si Epol Bakil, 18, residente sa Ponce II, barangay Carreta, anak ni Hadji Bakil kinsa anaa karon sulod sa bilanggoan human madakpi tungod sa ginadiling drugas. Uban ni Bakil atol sa hitabo mao ang gipasanginlang notadong tulisan nga nailang si Melvin Roble alyas Dinong.

Usa ka Perlito Casona, 21, taga T. Padilla Extension, barangay T. Padilla maoy mibarog nga reklamante batok nilang Bakil ug Roble human kini mipa-blotter sa Theft and Robbery Section human sa hitabo.

Silang Bakil ug Roble misakay sa PUJ padulong sa SM City apan mideklarar og tulis pag-abot sa sitio Tierra Cora. Apan naaktuhan sila ni PO3 Zuesito Veloso, sakop sa Provincial Investigation and Intelligence Branch sa Cebu Provincial Police Office, nga nag-roving sakay sa iyang motorsiklo.

Gisundan ni PO3 Veloso silang Bakil ug Roble sa ilang pag-ikyas hinungdan nga nasikop dayon si Bakil. Si Roble nakalingkawas.

Apan si PO3 Veloso nangayo og panabang sa TRS dungan ang pagsukitsukit kang Bakil. Si Bakil mitug-an ngadto sa TRS asa masikop si Roble.

Pinanguluhan ni SPO1 Jeffrey Diola, gihimo sa TRS ang hot pursuit operation sa usa ka balay sa Villagonzalo II, barangay Tejero ug didto nasikop si Roble sa akto nga nagsuyop og shabu.

Misulay unta pag-eskapo si Roble, apan nakuwilyohan dayon kini.

Nakuha sa posesyon ni Roble ang rebolber nga kalibre .357 nga adunay upat ka buhing bala, usa ka pakete nga adunay sulod nga gituohang shabu ug mga kagamitan sa pagsuyop niini.

Si Casona positibong miila sa duha ka suspetsado ug miangkon nga ang rebolber gikan ni Roble mao ang gition ngadto kaniya atol sa pagpanulis niini.

Gikatakdang ikiha silang Bakil ug Roble karong adlawa. (BANAT NEWS)