Valmoria andam moatubang sa CHR

CEBU, Philippines -  Mipadayag sa iyang kaandam ang direktor sa Cebu Provincial Police Office Sr. Supt. Carmelo Valmoria pag-atubang sa Commission on Human Rights (CHR) kini kun moreklamo si Ramon Patriarca ang gitumbok nga lider sa New Peoples Army (NPA) nga ilang nadakpan.

Si Valmoria pabiling miinsister nga legal ang ilang pagsikop kang Patriarca ug walay kamatuoran ang pasangil nga ilaha kining gi-torture dihang kini gitugutan sa korte nga paestoryahon sa miaging adlaw atol sa pagpaminaw sa Writ of Amparo nga gisang-at sa kampo niini.

Si Patriarca mipasangil nga gipuli-pulihan siya og kulata ug mipakita sa iyang mga bun-og diha sa korte, matud pa niya sukad siya madakpi niadtong adlaw’ng Huwebes gihuboan siya ug gipa-diaper ingon man gikulata samtang giinterogar.

Matud pa niini mikooperar siya dihang gidala sa sala ni Judge Geraldine Faith Econg si Patiarca niadtong miaging adlaw.

Subling gibarugan ni Valmoria ang pamahayag nga usa ka kriminal ug pinangita sa balaod si Patriarca gumikan sa mga krimeng nahimo niini sa pagpatay sa mga sakop sa PNP, militar ug sibilyan.

Gibutyag niini nga kusog kaayo ang intelligence report nga ilang nadawat nga luwason gyud si Patriarca sa ilang mga sakop gumikan sa ka importante sa position niining gihuptan.

Gikatahong lima ka posisyon gawas sa iyang pagka-deputy secretary general sa Komiteng Rehiyonal Sentral Bisayas sa NPA ang gihuptan ni Patriarca.

Kagahapong adlawa ang akusado pormal nang gidala sa sala ni Judge Edito Enemecio sa Regional Trial Court branch 25 sa dakbayan sa Danao nga maoy mipagawas sa warrant of arrest gumikan sa kasong rebellion.

Si Patriarca nadakpan niadtong miaging semana sa barangay Casili, Consolacion sa joint operation sa 78th IB ug sa kapulisan sa CCPO nga nipahigayon og checkpoint.  - Guam Logroño (BANAT NEWS)